luh jepun

Titiang penyeruan I ratu,
Nenten tatas indik matur

Geginan tiang wantah ngalap sekar, katur ring I ratu, angge ngias prabu I ratu sane megelung emas.

Luh Jepun wastan tiang.
Tiang boya ya I bungan sandat sane miik ngalub.
Nanging I ratu mapaica genah sekadi tiang I sekar sandat.

Ring merajan I ratu titiang mengayah, mekamen putih me senteng kuning.

Ngukup toya miik ngalub; agni ngeseng I kayu cendana, jebug arum, pandan arum, lan gendis.

Andus nusdus, maukup ukup toya kumkuman angge I ratu manyirat prabu magelung emas.

Rerantas, wajra , ketu sampun sayage.
Ngiring I ratu munggah
Titiang ngiring I ratu nyurya suwana.

I cempaka mebunga ngeryempyok, mereruntuhan ring natar merajan.

Iriki tiang mangayahin I ratu, mekidung warga sari, tedun tirta.

Anggob manah titiang,
I ratu mapaica genah ring merajan sane kasuciang.

Tiang luh jepun,
leteh antuk dosa.
Nyalanang idup ring margine kiwa.

Las I ratu nuntunin tiang pamargi,
Iriki titiang mangayahin sisan tuwuh sane kapaica,
ngiring I ratu,
ngiring pemargi sane kaloktah.

Tiang luh jepun ten tatas antuk matur.
Iriki mangayahin I ratu.


17 oktober 2009
D.purnami


Sent from my BlackBerry®
powered by Sinyal Kuat INDOSAT